Polisi wagawa taulo za kike kwa wanafunzi

Mtandao wa polisi wanawake Mkoa wa Manyara, katika wiki ya maadhimisho ya siku ya wanawake duniani, wamegawa taulo za kike maboksi 15 sawa na pakiti 360 kwa wasichana wa shule ya sekondari Komoto mjini Babati.

Pia, mtandao huo wa polisi wanawake wa mkoa wa Manyara, umetoa elimu ya kupinga ukatili na unyanyasaji wa kijinsia kwa wanafunzi hao na walimu wa shule hiyo.

Mwenyekiti wa mtandao huo, mrakibu mwandamizi wa polisi (SSP) Georgina Matagi ambaye pia ni mkuu wa kikosi cha polisi wa usalama barabarani mkoa wa Manyara, (RTO) ameyasema hayo wakati akizungumza na waandishi wa habari mjini Babati.

Matagi amesema wamegawa taulo hizo za kike kwa lengo la kuwasaidia wanafunzi wasichana wanaosoma kwenye shule hiyo wajisikie huru wakati wakipatiwa elimu katika shule hiyo.

Amesema pia wakiwa kwenye shule hiyo, wametoa elimu ya kupinga ukatili wa kijinsia, aina ya ukatili, maana ya ukatili wa kijinsia na kutoa taarifa za ukatili wa kijinsia.