Joseph adaiwa kumuua mpenzi wake kwa mapanga
Mkazi wa Goba Lastanza Kinondoni, Joseph Sanura maarufu kama Ngosha (31), anashikiliwa na Jeshi la Polisi Kanda Maalum ya Dar es Salaam kwa tuhuma za mauaji ya Penina Method Rwegoshora (28) mkazi wa Goba Center chanzo kikitajwa kuwa ni wivu wa mapenzi.
Taarifa ya Kamanda wa Kanda Maalum ya Polisi Dar es Salaam, SACP. Muliro Jumanne imeeleza kuwa tukio hilo limetokea Mei 23, 2024 majira ya 07:00 huko maeneo ya Goba Center, Kinondoni katika Pub ya iitwayo Penina.
Taarifa hiyo imeeleza kuwa, uchunguzi wa awali wa Polisi unaonesha kulikuwa na mgogoro wa kimahusiano kati ya mtuhumiwa na marehemu kabla ya kushambuliwa kwa panga na mtuhumiwa.
Aidha, taarifa ambazo tumezipata kwa vyanzo mbalimbali zinabainisha kuwa Joseph alikua anamuhisi mpenzi wake anachepuka, na inasemekana siku hiyo Penina hakurejea nyumbani hali iliyomlazimu mtuhumiwa kumfuata ofisini kwake na kumshambulia hadi kupelekea umauti.
Inaarifiwa kuwa pia Penina ameacha watoto wawili na mwili wake unazikwa hii leo Mei 24, 2024 jioni huko Goba huku Polisi ikisema upelelezi unakamilishwa, ili mtuhumiwa afikishwe Mahakamani haraka iwezekanavyo.
Akizungumza nasi ndugu wa marehemu Penina, amedai kuwa marehemu na mpenzi wake walikuwa na mpango wa kufunga ndoa mwezi Julai mwaka huu.
Mtuhumiwa wa tukio hilo alijisalimisha jana polisi baada ya kufanya mauaji majira ya saa 12 alfajiri kwenye baa ya mpenzi wake huyo ambaye anadaiwa hakurudi nyumbani usiku wa kuamkia siku ya tukio.
Penina ameacha watoto wawili na mwili wake unazikwa leo jioni Goba Dar es Salaam.