Mwenyekiti UVCCM auawa katika fumanizi

Mwenyekiti wa Umoja wa Vijana wa Chama Cha Mapinduzi (UVCCM) Kata ya Kaselya, Iramba mkoani Singida, Ramadhani Hamisi (30) ameuawa kwa kuchomwa na kitu chenye ncha kali tumboni baada ya kudaiwa kukutwa na mke wa Ally Athumani usiku wa Desemba 30, 2022.

Kwa mujibu wa gazeti la Raia Mwema, tukio hilo lililotokea katika Kitongoji cha Msisi linaelezwa kuwa marehemu alikuwa na uhusiano wa kimapenzi na mke wa Athumani, na walishakutwa mara kadhaa wakiwa pamoja na kupewa onyo juu ya tabia hiyo.

Mwenyekiti wa Kijiji cha Kaselya, Wazzael Majja amedai tukio hilo lilitokea majira ya saa nne usiku baada ya mtuhumiwa kuwakuta nyumbani kwake, na ndipo ulipoibuka ugomvi na kuanza kufukuzana gizani kisha kupotezana njiani, lakini mtuhumiwa alimvizia Ramadhani nyumbani bila yeye kujua na kumshambulia.