Mvua yaua wawili, maduka yajaa maji Morogoro
Morogoro. Watu wawili wamefariki dunia kwa kusombwa na maji kufuatia mvua kubwa iliyonyesha jana Ijumaa usiku Machi 6, 2020 Mkoa wa Morogoro nchini Tanzania kwa zaidi ya saa tatu huku maduka ya vifaa mbalimbali yaliyopo jirani na mto kikundi yakijaa maji na kuharibu bidhaa hizo.
Akizungumza na waandishi wa habari leo Jumamosi Machi 7, 2020 Mganga mkuu mfawidhi wa hospitali ya Wilaya ya Morogoro, Lita Lyamuya amethibitisha kupokea miili ya watu hao ambao tayari imehifadhiwa katika hospitali hiyo.
Amesema amepokea miili hiyo leo asubuhi ambayo iliopolewa kwenye maji katika maeneo tofauti ya manispaa ya Morogoro.
Kwa upande wake, mkuu wa Wilaya ya Morogoro ambaye pia ni Mwenyekiti wa kamati ya ulinzi na usalama ya wilaya hiyo, Regina Chonjo ametoa pole kwa ndugu wa wafiwa hao pamoja na wafanyabiashara walioingiliwa na maji kwenye maduka yao.
Amesema kazi iliyopo sasa ni kurudisha mazingira katika hali yake ya kawaida ikiwamo kusafisha mifereji na kuondoa takataka zilizonasa kwenye makaravati.
Mmoja wa wafanyabiashara waliopata hasara baada maji kuingia dukani kwake, Abdul Hussein amesema mvua hiyo imemsababisha hasara kwa sababu imenyesha usiku wakati maduka yakiwa yamefungwa.
