Mke wa mwenyekiti auawa na wasiojulikana
Conchester Gervaz ambaye ni mke wa mwenyekiti wa serikali ya mtaa wa Omkituri kata ya Kibeta katika manispaa ya Bukoba Mkoani Kagera, ameuawa na watu ambao hawajafahamika usiku wa kuamkia leo Juni 13, 2023
Mama mkwe wa marehemu Anajoyce Deus amesema kuwa akiwa nyumbani kwake saa 12 asubuhi alisikia mlio wa pikipiki kwa nje na baadae kusikia kuna watu wanabisha hodi katika nyumba ya mtoto wake ambaye ni mume wa marehemu
Mama huyo amesema kuwa baada ya kusikia mtoto wake amefungua mlango alifuatilia na kuwafuata kwa nyuma, na baada ya muda mfupi mtoto wake ambaye ni mwenyekiti wa mtaa wa Omkituri, Gervaz Nyomo alipiga kelele akiita jina la mke wake.
“Nikakimbia nikafika pale, nikamshika shingo na kumuomba mama aliyekuja na yule kijana wa pikipiki aniwashie tochi ya simu yake maana ya kwangu niliiacha ndani, akaniwashia nikaona shingoni kwa mbele kama kuna shimo kama amechomwa kwa kitu, nikamwambia mwanangu huyu ameishakufa” amesema mama mkwe wa marehemu. Diwani wa kata ya Kibeta lilipotokea tukio hilo, Anastela Alphonce amesema amepigiwa simu saa moja asubuhi na kuelezwa kuwa katika kata yake kuna tukio la mauaji, na kuamua kwenda eneo la tukio.
Naye meya wa manispaa ya Bukoba Godson Gibson, akizungumza katika eneo la tukio ameviasa vyombo vya ulinzi na usalama kuongeza kasi katika kufuatilia ili kupata majibu na suluhisho la matukio ya namna hiyo.
Mkuu wa wilaya ya Bukoba ambaye pia ni mwenyekiti wa kamati ya ulinzi na usalama Erasto Sima amesema haijajulikana mauaji hayo yametokea saa ngapi lakini mwili wa mwanamke huyo umeokotwa alfajiri mbele ya nyumba ya mwenyekiti, na polisi wameanza uchunguzi.
“Mimi nimemuuliza mume wake, saa kumi na moja alfajiri mke wako amekutwa nje ameuawa alikuwa wapi, alichoniambia yeye ni kwamba alichelewa kurudi alikuwa mitaani ni dereva wa bodaboda
"Lakini akasema mke wake wakati mwingine huwa anachelewa kurudi nyumbani kwa sababu ana majukumu yake mengine, lakini alijua mke wake yupo, mpaka alipoitwa kwenda kushuhudia kama mwenyekiti bila kujua kama aliyeuawa ni mke wake” amesema Sima.
Mauaji ya mke wa mwenyekiti wa mtaa wa Omkituri kata Kibeta katika manispaa ya Bukoba, yamefanyika ikiwa imepita miezi minne tangu yalipofanyika mauaji ya mke wa mwenyekiti wa mtaa wa National Housing kata Rwameshenye katika manispaa hiyo.