Miili ya watu watano waliokufa Siha yaagwa
Miili ya watu watano katika ya 10 ya waliofariki kwa ajali imeagwa jana Agosti 22, 2023 katika Wilaya ya Siha, Mkoani Kilimanjaro na kusafirishwa kwenda maeneo mbalimbali ya mkoa na nje ya mkoa huo kwa ajili ya taratibu za maziko.
Watu hao walifariki dunia Agosti 18 katika eneo la Dachikona, Kijiji cha Wiri, wilayani humo baada ya gari aina ya 'Kirikuu' kugongana uso kwa uso na lori la polisi ambalo lilikuwa limetoka kupeleka chakula kwenye kambi ya Jeshi la polisi wilayani humo, ambapo watu 10 wakiwemo wanawake 6 na wanaume wanne waliopoteza maisha akiwemo dereva wa gari la polisi.
Akitoa salamu za rambirambi kwa niaba ya Serikali wakati miili hiyo ikiagwa, Mkuu wa Wilaya ya Siha, Christopher Timbuka alitoa pole kwa familia zilizokumbwa na msiba huo na kusema serikali ipo pamoja nao katika kipindi hiki cha majonzi.
"Tangu juzi Rais alituma salamu za pole naomba mzipokee, Serikali ya Wilaya ya Siha tunatoa pole zetu kwa familia zote zilizogumswa na msiba huu, ni msiba mzito lakini hakuna namna tuyapokee na sisi tujiandae maana ni njia yetu sote,"
Amesema kesho kutakuwa na shughuli ya kusafirishwa miili mingine mitatu kwenda maeneo mengine kwa ajili ya taratibu za maziko. "Naomba mlipokee hili jambo na Mwenyezi Mungu awatie nguvu," amesema DC Timbuka.