Miili ya watu watano iliyookotwa Songwe yazikwa

Serikali imezika miili ya Watu watano iliyookotwa ikiwa imetupwa porini pembeni ya barabara Kuu ya Mbeya-Tunduma eneo la Mlima Senjele Kata ya Nanyara Wilayani Mbozi Mkoa wa Songwe.

Miili hiyo ambayo iliokotwa May 10 mwaka huu imezikwa jana Jumatano Mei 17, 2023 katika makaburi ya Mantengu nje kidogo ya Mji wa Vwawa Wilayani Mbozi baada ya miili hiyo kutotambulika.

Akiongea kabla ya miili hiyo kuzikwa, Kamanda wa Polisi Mkoa wa Songwe, Theopista Mallya amesema miili hiyo inazikwa baada ya kupita siku saba bila kutambulika.

"Siku saba ndio zimepita na miili hiyo haijatambulika, Wananchi wamekuwa wakifika kwenye Hospitali ilikohifadhiwa miili hiyo lakini haijatambuliwa, sisi kama Polisi tumechukua sampuli ili kama Ndugu wakija tuweze kulinganisha"

Mganga Mfawidhi wa Hospitali ya Wilaya ya Mbozi, Dkt. Keneth Lesilwa amesema wameshachukua sampuli za miili hiyo kama walivyoelekezwa na Mkemia Mkuu ili kama kuna watu watakuja kudai kuwa ni Ndugu zao waweze kupimwa DNA.