Mapya yaibuka mtoto wa miaka 11 aliyejinyonga

Mama mzazi wa mtoto Yusra Hassan (11) mkazi wa Nyengedi Mkoani Lindi aliyefariki kwa kujinyonga ameeleza kuhusu kifo cha mtoto huyo huku akihusianisha tukio la kifo cha mtoto wake na imani za kishirikina.

Fatuma Salum Mama wa marehemu anasema, kifo cha mwanaye hakikuwa cha kawaida kwani anamfahamu kwa namna alivyomlea na si rahisi kwake kuchukua maamuzi hayo.

"Sielewi nnapoambiwa mwanangu amejinyonga hakuwa na hasira na hata alipokosea nilikuwa ninamuadhibu lakini hakuwahi kufanya kitu kama hiki" Fatuma Salum, Mama mzazi wa Yusra.

Aidha bibi wa mtoto huyo ameeleza hali ya mtoto huyo kabla ya kifo chake "Siku moja kabla hajafariki alikuwa anaumwa tumbo, alisema anasikia kitu kinatoka juu kinadondoka chini" Habiba Nandoli, Bibi wa mtoto Yusra (11) aliyejinyonga Nyengedi, Lindi.

Kwa mila na Desturi za watu wa mikoa ya kusini mwa Tanzania, kutohitimisha msiba wa marehemu kwa kufanya 40 ni kigezo kimojawapo kuwa familia haijaridhika na namna ndugu yao alivyofariki ambapo familia hiyo haijapanga kuhitimisha kwa kufanya shughuli hiyo ya 40.

Binti huyo aliyekuwa akisoma darasa la pili inaelezwa kuwa tarehe 17 mwezi wa 5 alishindwa kwenda shule kwa kigezo kuwa anaumwa, ambapo alifanya kazi za nyumbani na kufua nguo zake ambapo muda wa saa 5 alijinyonga kwa kutumia nguo na kufariki.