Amos Makalla, Mkuu wa Mkoa wa DSM.
Mkuu wa Mkoa wa Dar es Salaam, Amos Makalla, amewaelekeza Wakala wa Barabara za Vijijini na Mijini (TARURA) na Wakala wa Barabara Tanzania (TANROADS) kuhakikisha wanalinda Miundombinu ya Barabara zao hususani maeneo ya watembea kwa miguu yasivamiwe upya na Wafanyabiashara.
Makalla ametoa maelekezo hayo leo Desemba 29, jijini Dar es Salaam, wakati wa ufunguzi wa kikao cha bodi ya Barabara ambapo pia amewataka Wakandarasi wanaotekeleza miradi ya barabara kukamilisha ujenzi kwa wakati na kushirikiana na wananchi na serikali ya mtaa wa eneo husika ili wajue nini kinaendelea katika mtaa wao.
Aidha amewataka TANROAD na TARURA na Wakandarasi kuenda sambamba na maono ya Rais Samia Suluhu, katika kuwafikishia wananchi maendeleo kwa wakati.
Katika hatua nyingine, Makalla amewataka TARURA kuhakikisha wanashirikiana na Baraza la Madiwani katika kuchagua barabara za kipaumbele cha ujenzi na sio kujiamulia wao wenyewe.
“Madiwani ni wawakilishi wa wananchi ndio wanaelewa barabara zenye changamoto kubwa na zinazotegemewa na wananchi wengi hivyo ni muhimu wakashirikishwa.”alisisitiza.