Magari ya abiria Bukoba yagoma

Bukoba. Abiria waliokuwa wasafiri kwenda maeneo mbalimbali mkoani Kagera wameendelea kusota katika stendi ya mabasi Bukoba baada ya kuanza kwa mgomo wa madereva leo asubuhi Jumanne Novemba 27, 2018.

Abiria hao wamekaa katika makundi mbalimbali bila kujua hatima yao huku wakitegemea Serikali kuingilia kati.

Kufuatia mgomo huo, abiria waliokuwa wasafiri kutoka wilaya mbalimbali kuja mjini Bukoba wanatajwa kukwama baada ya kukosekana kwa usafiri.

Mgomo huo unatokana na magari yanayotoa huduma kupinga ongezeko la ushuru kutoka Sh1,000 hadi Sh2,000 kwa magari madogo Hiace na Sh2,000 hadi Sh4,000 kwa Coster huku kukiwa hakuna maboresho yoyote yaliyofanyika kituoni hapo.

Mwenyekiti wa chama cha kutetea abiria Mkoa wa Kagera (Chakua), Samidu Bashiru amepinga ongezeko la ushuru mpya uliotangazwa na Manispaa ya Bukoba.

Bashiru amesema stendi hiyo haina choo wala jengo la kupumzikia abiria, huku akipinga ongezeko hilo ambalo halikuwahusisha madereva na wamiliki.

 

Endelea kufuatilia Mwananchi