Dar es Salaam. Mamia ya wakazi wa Jiji la Dar es Salaam wamejazana katika Uwanja wa Taifa linakofanyika kongamano la ndoa ya familia, huku baadhi wakieleza kuwa wamefika hapo baada ya kusikia habari kuwa itatolewa mikopo kwa familia masikini na wajane.
Kongamano hilo limeanza leo asubuhi Jumamosi Agosti 31, 2019 huku mgeni rasmi akiwa mkuu wa Mkoa wa Dar es Salaam, Paul Makonda.
Baadhi ya wanawake na wanaume waliozungumza na Mwananchi nje ya uwanja huo wamesema katika maeneo waliyotoka, waliandikishwa majina wakielezwa kuwa inatolewa mikopo.
Wengine wamesema waliandikishwa majina kupitia wajumbe wa mashina na kuelezwa kuwa kuna shirika kutoka Korea linagawa misaada kwa familia masikini na wajane.
Flora John, mkazi wa Kigogo amesema amefika uwanjani hapo tangu saa 1 asubuhi na haoni dalili yoyote licha ya kuelezwa kuwa kuna kongamano la amani.
"Tuliandikishwa majina na wajumbe wa mashina nimefika na mtoto tangu saa moja kasoro hapa sielewi kinachoendelea," ameeleza Flora.
Zubeda Salum, mkazi wa Gongo la Mboto ameeleza kuwa waliandikishwa majina na wajumbe kupitia vikundi vyao na kuelezwa kufika katika Uwanja wa Taifa kwa ajili ya kupata mikopo.
