Kizimbani kwa mauaji ya kishirikina Singida

Watu watano wamefikishwa katika mahakama ya wilaya ya Manyoni mkoani Singida wakikabiliwa na mashtaka ya mauaji ikiwa ni siku chache baada ya jeshi la polisi mkoani humo kutoa taarifa ya kukamatwa watuhumiwa wa mauaji ambayo yanadaiwa kuhusishwa na imani za kishirikina.

Imeelezwa kuwa Agustino, Emmanuel Joseph Ngosha na Emmanuel Ephraim Mola wote wakazi wa Majengo Manyoni kwa pamoja walimuua Michael Mwimbwa maeneo ya shule ya msingi Manyoni ikiwa kinyume na kifungu cha sheria ya kanunia ya adhabu sura ya 16 iliyofanyiwa marejeo mwaka 2022.

Aidha katika kesi nyingine Agustino Kenan, Jeremia Nyungu Abdallah Mnyamisi na Emmanuel Ephraim wote kwa pamoja mnamo tarehe 28 March 2023 majira ya usiku maeneo ya stand kuu mtaa wa Majengo walimuua Zephania Richard huku ikiwa kinyume na kufungu namba 16 ya sheria ya kanuni ya adhabu.

Washtakiwa hawakutakiwa kujibu lolote kwakuwa mahakama hiyo haina mamlaka ya kusikiliza kesi hizo.

Upelelezi wa kesi hizo bado unaendelea ambapo hakimu mkazi mfawidhi wa mahakama ya wilaya Manyoni Alisile Mwankejela ameahirisha kesi hizo hadi tarehe 2/05/2023 kesi hizo zitakapotajwa tena.