Arusha. Hatimaye kaya 109 zimetakiwa kumlipa fidia jumla ya Sh519.3 milioni kikongwe Nasi Muruo(98) mkazi wa eneo la Sinoni, katika jiji la Arusha, baada ya kurejeshwa ardhi yake aliyokuwa anaidai kwa miaka 42 .
Waziri wa Ardhi Nyumba na Maendeleo ya Makazi, William Lukuvi ametangaza leo Jumatano Agosti 28,2019 uamuzi huo wakati akizungumza na kaya hizo na bibi Muruo katika viwanja vya shule ya msingi Sinoni.
Lukuvi alikuwa ameandamana na mkuu wa wilaya Arusha, Gabriel Daqaro na maofisa ardhi katika kutatua mgogoro huo.
Amesema kila kaya italipa kiasi cha Sh20,000 kwa mita moja ya mraba katika eneo la bibi huyo, lakini italipia pia fedha za kupimwa ardhi ili kupewa hati ndani ya miezi mitatu
Kikongwe huyu alirejeshewa ardhi yake, Julai 8, 2019 na Waziri Lukuvi, kutokana na maelekezo ya Rais John Magufuli wa Tanzania, alipomtaka kushughulikia mgogoro huo, hasa baada ya kuripotiwa malalamiko ya Kikongwe huyo, kunayanyang’anywa ardhi yake tangu mwaka 1977 na ndugu wa ukoo wao, Edward Lenjeshi
Akizungumza na Mwananchi, Nasi Muruo ameshukuru Rais Magufuli na Lukuvi kwa uamuzi huo ambao umeugwa mkono na pande zote.
Wakizungumza katika uwanja wa Sokoni, baadhi ya wamiliki wa viwanja ambao watatakiwa kulipa fidia walisema wamekubali na hawawezi kupingana na serikali.
"Hatupingani na serikali na tunaamini tutapata na kulipa kidogokidogo "alisema Omar Mgaza
Wakili Hamis Mkindi wa kituo cha sheria na haki za binaadamu(LHRC) ambao wamekuwa wakimtetea bibi huyo, amesema wanaridhishwa na hatua ambazo zinaendelea kuhakikisha bibi Muruo anapata haki.
Waziri Lukuvi Agosti 8,2019 akizungumza na pande zote katika mgogoro huo, alisema baada ya kazi ya upimaji viwanja katika kaya109 kukamilika, itafanyika tathimini ya kila kaya kumlipa kiasi gani bibi huyo na ambao watashindwa kwa muda utakaowekwa makazi yao yataondolewa na eneo hilo kukabidhiwa bibi huyo.
Hata hivyo, Waziri Lukuvi aliagiza eneo la wazi katika ekari hizo nane, akabidhiwe bibi huyo baada ya kulipima.
