Mtoto auawa kwa kupigwa mateke
Mtoto Jovin Simon (10) mkazi wa mtaa wa Elimu Kata ya Nyankumbu mjini Geita amefariki dunia baada ya kudaiwa kupigwa mateke tumboni na mwenzake mwanafunzi wa darasa la saba katika shule ya msingi Mkombozi iliyopo mjini hapa.
Simon alifariki dunia Agosti 29, 2022 wakati akipatiwa matibabu katika hospitali ya Mkoa wa Geita alipolazwa kuanzia Agosti 25.
Akizungumzia tukio hilo mama mzazi wa Simon, Irene Buholo amesema mwanaye alirudi nyumbani akilia huku akidai amepigwa na mtoto mwenzie ambae ni jirani yao.
“Kutokana na hali ya mtoto kuwa mbaya tulienda polisi na kupewa PF3 na kumpeleka hospitalini alipimwa na kufanyiwa uchunguzi daktari akasema bandama imepasuka damu inavujia ndani”
“Jana asubuhi saa 12 baba yake alinipigia akitaka niwahi kwenda hospitali ili yeye akapumzike mtoto akachukua simu ya baba yake akaniambia mama ‘I love you’ kufika hospitali nikakuta wamemzungushia shuka la kijani tayari amekufa” amesema Buholo.
Kaimu kamanda wa Polisi mkoani Geita, Ally Kitumbo amethibitisha kutokea kwa tukio hilo na kusema chanzo cha kifo ni ugomvi.
Amesema mwili wa mtoto huyo umehifadhiwa katika hospitali ya Mkoa wa Geita na mtuhumiwa anashikiliwa kwa uchunguzi zaidi na upelelezi utakapokamilika taratibu za kisheria zitafuatwa.