Familia yasusia mwili wa marehemu

Familia ya Kijana Alex Kihomwe Mkazi wa Mtaa wa Msichoke Manispaa ya Iringa aliyepoteza maisha katika mazingira ya kutatanisha baada ya kushikiliwa na Jeshi la Polisi na kukaa Mahabusu kwa wiki mbili, imetoa msimamo kuwa hawatochukua mwili wa marehemu mpaka uchunguzi ufanyike na ubainishe wazi sababu za Kijana wao kupoteza maisha .

Baada ya kufika nyumbani kwa Wazazi wa marehemu ili kuweza kujua ni nini hatma ya sakata hilo ambapo wamesema hadi sasa hawajui sababu zilizopelekea Polisi kumkamata Kijana huyo ambapo Wazazi hao, Ndugu na Majirani wamesisitiza kuwa hawako tayari kuuchukua huo mwili hadi pale uchunguzi wa kitaalamu utakapofanyika na ndipo wachukue mwili huo.

Kwa upande wake Kamanda wa Polisi Mkoa wa Iringa Allan Bukumbi amethibitisha kutokea kwa kifo hicho na amesema Kijana huyo alikuwa anashikiliwa na Polisi kwa kesi ya ubakaji na unyang’anyi maeneo ya Chuo Kikuu cha Iringa na hajafia Mahabusu bali alizidiwa ghafla akiwa Mahabusu akapelekwa Hospitali ambako alifia kutokana na sukari kushuka.