Chalamila kuanza ziara leo usiku Dar

Mkuu wa Mkoa wa Dar es salaam, Albert Chalamila amesema leo October 22,2024 ataanza ziara ya siku tano kuanzia saa 2 usiku hadi saa 11 alfajiri kwa ajili ya kukagua miradi na kujionea shughuli za kiuchumi na kijamii zinavyoendeshwa usiku katika Mkoa wa Dar es salaam.

Akiongea leo wakati wa hafla ya utiaji saini wa ujenzi wa Daraja la Jangwani, Chalamila amesema “Leo ninaanza ziara ya siku tano ambayo itaanza saa 2 usiku na kuisha saa 11 alfajiri, lengo la ziara ni nini?, la kwanza tumesema miradi ifanye kazi saa 24, mchana tunaiona inafanya kazi lakini je usiku inafanya kazi?, nani Shuhuda wa kutueleza kuhusu usiku?”

“Pili tumesema tunajiandaa kufungua biashara saa 24, je tumeshasoma tabia ya Mkoa wetu wa Dar es salaam ya kufanya kazi usiku, tukasema ni vizuri tufanye ziara hii usiku na tumesema baadhi ya ofisi zitakuwa wazi saa 24 mfano ofisi ya ardhi, na moja ya barabara tutazikagua na za mwendokasi na miradi mingine”