Chalinze. Abiria saba kati ya 42 wamejeruhiwa baada ya basi walilokua wanasafiria la Friends lililokuwa linatoka Dar es Salaam kwenda Kampala, Uganda kuacha njia na kupinduka leo Jumatatu Machi 18, 2019.
Ajali iyo imetokea katika kijiji cha kwa Zoka Vigwaza Halmashauri ya Chalinze wilayani Bagamoyo mkoa wa Pwani.
Kamanda wa Polisi mkoa wa Pwani, Wankyo Nyigesa amesema basi hilo aina ya scania mali ya kampuni ya Friends lilikua linatoka Dar es Salaam kwenda Kampala nchini Uganda ikiwa na abiria hao 42.
"Ni kweli leo imetokea ajali hii na taarifa nilizonazo kutoka kwa wasaidizi wangu ni kwamba walioumia sana ni wanane, kati yao wapo waliovunjika mkono, mguu na wenye majeraha makubwa kichwani.”
Alisema baada ya ajali hiyo, majeruhi walipelekwa kituo cha afya Mlandizi.
Kamanda huyo amewataja majeruhi hao kuwa ni Kubo Zuber (24), Rudingo Benjamin (24), Baiga Jacquie (30) wote wakazi wa Uganda.
Wengine ni Aisha Salin (34), Theonestina Gedion (29), Nasra Aman (12) na Hassan Omary (45) wakazi wa Dar es Salaam.
Ameongeza dereva wa basi hilo Bashiru Telu mkazi wa Uganda amekimbia eneo la tukio mara baada ya ajali hiyo na kwa sasa anasakwa na polisi.
Amesema chanzo cha ajali hiyo ni uzembe wa dereva huyo kwani alikua anayapita magari mengine ya mbele yake bila kuchukua tahadhari.