Ashambuliwa kwa mawe hadi kufa

Mkazi wa Kijiji cha Kanisani, Kata ya Sirari, Tarafa ya Inchugu wilayani Tarime mkoani Mara, Mwita Nyamhanga, amefariki dunia baada ya kushambuliwa kwa kipigo kwa madai ya kumtukana mama yake mdogo.

Mwenyekiti wa Kijiji cha Kanisani, Nyamagige Gesamarwa, akizungumzia tukio hilo alisema; "Kipigo kilichosababisha kifo kwa majeruhi.

Mwita Nyamhanga, kilitokea Januari 24 nyumbani kwao, baada ya kutokea ugomvi kati yake na mama yake mdogo na kumtolea matusi ya nguoni.”

Alisema baadhi ya vijana waliosikia matusi hayo walikasirika na kuingilia kati kwa kurusha mawe ambayo yalimpata Mwita sehemu mbalimbali za mwili na kumjeruhi.

Alipelekwa katika Hospitali ya Isebania Migori nchi jirani ya Kenya na alipokuwa akiendelea na matibabu alikutwa na umauti.

Kamanda wa Polisi Mkoa wa Kipolisi Tarime Rorya, ACP Geofrey Sarakikya, alithibitisha kutokea tukio hilo la kuuawa kwa Mwita na wanaendelea na uchunguzi na kuwasaka watuhumiwa.