Ajali yaua watatu Dodoma wakitoka mnadani

Watu watatu wakazi wa Lugala, Kata ya Manzase Mkoani hapa, wamefariki dunia usiku wa kuamkia leo baada ya gari aina ya Noah walilokuwa wamepanda kutumbukia kwenye Korongo.

Kamanda wa Polisi Mkoa wa Dodoma, Martin Otieno, amethibitisha kutokea kwa ajalibhiyo na kuahidi kutoa taarifa kamili baadae.

Awali imeelezwa kuwa dereva wa gari hilo alishindwa kupandisha mwinuko uliopo kwenye barabara kuu katika eneo hilo, hali iliyosababisha kupoteza mwelekeo na kuingia kwenye korongo lililopo karibu na barabara hiyo.

Akizungumza kuhusu ajali hiyo leo Agosti 2,2023 Diwani wa Kata ya Manzase, John Mika, amesema saa 2 usiku gari hiyo ilichukua abiria kutoka mnada wa Fufu na kuwarudisha kwenye maeneo yao.

John amesema waliofariki ni Amos Matereka, John Nghambi na Nhoya Mashamba ambao familia za zinatarajia kufanya maziko leo huku majeruhi wawili wakiendelea kupatiwa matibabu katika Hospitali ya Rufaa ya Mkoa wa Dodoma.

Aidha amesema watu nane waliotolewa kwenye gari hilo walipatiwa matibabu kwenye Zahanati ya kata na kufanya idadi ya watu waliokuwepo kwenye gari hiyo kuwa 13.

Mkazi wa kijiji hicho Anna Chihicha ameiomba Serikali kuwasaidia kusawazisha eneo hilo ambalo lina mwinuko hivyo kuhatarisha usalama wa watumiaji wa eneo hilo.