Abiria 24 wanusurika kifo, wanane wajeruhiwa Mbozi Songwe

Madereva wawili mmoja wa basi dogo aina ya Coaster na Dereva wa Lori aina ya fuso wanashikiliwa na polisi kwa kusababisha ajali wakati wakijaribu kuyapita magari mengine eneo la mlimani lisiloruhusiwa.

Kamanda wa Polisi Mkoa wa Songwe, ACP Theopista Mallay amesema ajali hiyo imetokea Juni 15, 2023 muda wa saa 5.30 asubuhi wakati madereva wote wawili wakijaribu kuyapita magari mengine, lakini ghafla waliona gari lingine linakuja mbele yao na walipojaribu kurudi upande wao magari hayo yaligongana

Amesema magari hayo yaligongana wakati kila moja likitaka kurudi upande wake baada ya kila moja kuyapita malori kwenye kilima.

Amesema katika ajali hiyo watu nane walijeruhiwa lakini wawili ambao wote ni madereva walitibiwa na kuruhusiwa ingawa wote wanashikiliwa na polisi.

Amesema madereva hao wanashikiliwa kutokana kufanya uzembe wakitaka kuyapita magari mengine eneo ambalo hairuhusiwi.

Kamanda Mallya amesema madereva wa magari yaliyopata ajali wote waliyapita magari kwenye eneo lisiloruhusiwa na kwamba yaligongana wakati kila mmoja akitaka kurudi upande wake eneo la katikati ya magari.

Aidha kufuatia ajali hiyo manusura 26 wakiwamo abiria 24 wamenusurika kifo katika ajali hiyo.