Watoto wa vigogo wang'ara uchaguzi Chipukizi CCM

Qaillah Bilal, mtoto wa msanii Nurdin Bilal maarufu Shetta, ameibuka kidedea kuwa mwenyekiti wa Chipukizi CCM Taifa.

Katika mkutano mkuu wa tisa wa Chipukizi Taifa uliofanyika mkoani Dodoma, pamoja na mambo mengine ulifanya uchaguzi jana Desemba 20, 2023.

Wagombea wa nafasi ya mwenyekiti walikuwa Neema Kinyonga aliyepata kura 13, John Mpoto (17), Hytham Mwanyemba (96) na Qaillah (303).

Isack Nchemba, mtoto wa Waziri wa Fedha, Dk Mwigulu Nchemba, amechaguliwa kuwa mjumbe Chipukizi wa Baraza Kuu la UVCCM- Bara. Kwa nafasi hiyo Zanzibar, aliyechaguliwa ni Aiman Mohammed.

Matokeo hayo yalitangazwa na msimamizi mkuu wa uchaguzi huo, ambaye ni Mkuu wa Wilaya ya Bariadi, Simon Simalenga.

Kwa nafasi ya makamu mwenyekiti wa Chipukizi Taifa, Simalenga amesema mshindi ni Atka Hassan Juma aliyepata kura 372.

Amewashinda Zainab Masoud Said aliyepata kura tatu, Salim Issa Nassor (7), Aimar Omar Mohammed (31), Mgeni Mohammed (6), Mudhiri Seif Kassim (5), Mariam Hamad Ally (2) na Mwansalama Daudi (3).

Simalenga amesema kwa upande wa wasichana aliyeshinda nafasi ya mjumbe wa kamati ya uendeshaji taifa ni Briana Mahiga aliyepata kura 151.

Kwa upande wa wavulana, mshindi ni Simba Silaa aliyepata kura 155 aliyewashinda Omar Hajji aliyepata kura 45, Raphat Ally (141), Mussa Shabani (64) na Abdallah Faraj (117).

"Kwa kura hizo nawatangaza wajumbe wa kamati ya uendeshaji Chipukizi Taifa kuwa ni Briana Mahiga na Simba Silaa," amesema Simalenga.

Amesema washindi wa kamati ya uendeshaji ya Chipukizi Taifa- Zanzibar, mshindi ni Khanima Kashmir aliyepata kura 283 na Ummukuluthumu Mrako aliyepata kura 369.

Nafasi ya mjumbe wa mkutano mkuu UVCCM Taifa- Zanzibar mshindi ni Aimar Omar Mohammed aliyapata kura 162 akiwashinda Said Ally aliyepata kura 67 na Thabit Kipaya (121).

"Kwa upande wa wajumbe wa Mkutano Mkuu UVCCM Taifa-Bara washindi ni Goodluck Mutahaba aliyepata kura 185 na Mariam Sombi aliyepata kura 284,” amesema.