TanzaniaWeb
Mbeya. Mbunge wa Mbeya Mjini (Chadema), Joseph Mbilinyi maarufu Sugu leo Jumamosi Agosti 3, 2018 ametinga katika mkutano wa hadhara na faili lenye orodha ya ahadi mbalimbali alizozitekeleza tangu mwaka 2015.
Akizungumza leo jioni katika mkutano huo uliofanyika katika stendi ya Tukuyu-Uyole mjini hapa, Sugu amesema ameamua kufanya hivyo baada ya kuibuka maneno ya kumchafua kuwa hajafanya chochote tangu alipochaguliwa kuwa mbunge.
"Makamanda msishangae kuniona nimeshika faili mkononi. Nipo hapa kwa ajili ya kuwaeleza mambo niliyoyafanya tangu mliponichagua maana kuna watu wanazunguka mitaani kunichafua kuwa sijafanya kitu" amesema Sugu.
Amesema tangu alipochaguliwa kwa mara ya kwanza kuwa mbunge mwaka 2010 hadi sasa amefanikiwa kujenga madaraja zaidi ya 10 yanayounganisha jiji la Mbeya na Mbeya vijijini pamoja na kujenga maabara za kompyuta kila shule ya kata na kusomesha watoto yatima zaidi ya 400.
"Nimefanya vitu vingi lakini mimi sio mtu wa kiki eti niwaite waandishi wa habari kwa kila kitu ninachokifanya kama wapinzani wangu wanavyofanya,” amesema Sugu.