Samia aomba JPM aongezwe miaka 5

MGOMBEA Mwenza wa Urais wa Tanzania kupitia Chama Cha Mapinduzi (CCM), Samia Suluhu Hassan, amewaomba Watanzania waendelee kukiamini chama hicho na kumpa miaka mingine mitano Rais John Magufuli ili azidi kuwafanyia makubwa kupitia uongozi wake uliotukuka.

Aliyasema hayo kwa nyakati tofauti alihutubia wananchi katika mikutano ya kampeni katika Viwanja vya Shule ya Msingi Gairo B wakati alipozindua kampeni za chama hicho mkoani Morogorona katika viwanja vya Shule ya Msingi Dumila wilayani Kilosa.

Alisema, katika kipindi cha Uongozi wa Serikali ya Awamu ya Tano chini ya Rais Magufuli, changamoto nyingi katika Jimbo la Gairo zimefanyiwa kazi ikiwa ni pamoja na ukamilishwaji mradi mkubwa wa maji.

Alisema Rais Magufuli akichaguliwa kwa kipindi kingine cha miaka mitano, atazifanyia kazi changamoto ndogo ndogo zilizobaki ukiwemo ujenzi wa barabara ya kiwango cha lami na baadhi ya madaraja kutoka Gairo hadi Kilindi ili kuiunganisha wilaya hiyo na Tanga.

Katika mkutano huo wa kampeni jimboni Mikumi katika Wilaya ya Kilosa, Samia aliwaomba Watanzania kumpigia kura za ndiyo Rais Magufuli katika Uchaguzi Mkuu utakaofanyika Oktoba 28, mwaka huu kuchagua rais, wabunge na madiwani.

Mbunge Mteule wa Jimbo la Gairo, Ahmed Shabiby alishukuru Serikali ya Awamu ya Tano kwa kutekeleza Ilani ya CCM ukiwemo ukamilishaji mradi mkubwa wa maji uliouwezesha mji wa Gairo kumaliza tatizo la ukosefu huduma hiyo.