Sabaya Mwenyekiti mpya CCM Arusha

Thomas Ole Sabaya leo Jumatatu Desemba 4, 2023 ameibuka mshindi katika nafasi ya uenyekiti wa Chama cha Mapinduzi (CCM) Mkoa wa Arusha baada ya kupata kura 463 na kuwazidi wapinzani wake watatu.

Sabaya aliyewahi kuwa Mkuu wa Wilaya ya Serengeti ambae pia ni baba wa aliyekuwa Mkuu wa Wilaya ya Hai, Lengai Ole Sabaya amefanikiwa kushinda kiti hicho katika uchaguzi mdogo wa nafasi hiyo iliyoachwa wazi na Steven Zelothe ambaye alifariki dunia.

Msimamizi wa uchaguzi wa CCM, Anthony Mtaka, amesema walitarajia wajumbe 1,001 wapige kura lakini waliofanikiwa kutumia haki yao ya msingi ni 906.

Alisema kuwa wagombea wanne waliteuliwa na kupigiwa kura ambapo Sabaya ameshinda kwa kura 463 akifuatiwa na Daniel Palangyo aliyepata kura 374 huku Solomon Kivuyo akipata kura 59 na Edina Kivuyo akipata kura 10.