Makada 37 wajitosa kuwania uenyekiti CCM Mwanza

Makada 37 wa Chama Cha Mapinduzi (CCM) Mkoa wa Mwanza wamejitokeza kuchukua fomu za kuwania uenyekiti wa mkoa huo baada ya nafasi hiyo kuwa wazi kutokana na aliyekuwa mwenyekiti wa chama wa mkoa huo, Sixbert Jichubu kuteuliwa kuwa Mkurugenzi wa Halmashauri ya Masasi.

Hayo yamesemwa na Katibu wa CCM mkoa huo, Omari Mtuwa huku akiongeza kuwa idadi hiyo inatokana na uwapo wa demokrasia ndani ya chama.

“Tangu fomu zianze kutolewa Novemba 12, 2023 hadi sasa idadi ya waliochukua fomu ni 37 na tunatarajia itaongezeka, hii ni kutokana na demokrasia iliyoimarika ndani ya chama chetu,” amesema Mtuwa.

Baadhi ya makada waliochukua fomu kuwania nafasi hiyo ni aliyekuwa Katibu wa Itikadi na Uenezi CCM Mkoa wa Mwanza, Simon Mayunga, Mwenyekiti wa CCM Wilaya ya Misungwi, Michael Smart na Mwenyeki wa CCM Wilaya ya Sengerema, Marco Makoye.