Mwanga. Katibu Mkuu wa Chama cha Mapinduzi (CCM) nchini Tanzania, Dk Bashiru Ally amewataka wanachama wa chama hicho kuwanyima kura wagombea wake walevi na wasio na sifa watakaopitishwa katika vikao vya uteuzi kuwania nafasi mbalimbali.
Dk Bashiru aliyepo mkoani Kilimanjaro kwa ziara ya siku nne ametoa kauli hiyo leo Jumatano Julai 10, 2019 wakati akizungumza na viongozi wa ngazi mbalimbali wa chama hicho tawala.
“Akiteuliwa mlevi hata kama ni wa CCM mnyimeni kura maana hana sifa huyo. Hakuna sababu ya kuletewa watu wasio na sifa kwa kuwa chama chetu kimesheheni wanachama wenye sifa.”
“Akipitishwa mtu asiye na sifa na mwenye sifa akaachwa wanachama mkataeni ili wanaofanya mchezo washike adabu,” amesema Dk Bashiru.
Amewataka wenye mamlaka ya uteuzi kutojilaumu wakimchagua mgombea asiyefaa, kuwaonya kuacha kuteua watu kwa urafiki, undugu au kuwaacha wengine kwa chuki binafsi.
“Chagueni mgombea mkimlinganisha sifa zake na za Rais John Magufuli. Hicho ndio kielelezo na kila mtakayemteua mjiulize ataweza kufanya kazi na Magufuli. Awe mzalendo kama yeye (rais Magufuli), mwaminifu na mpenda haki anayebeba sifa za chama chetu,” amesema.
Pia Soma
- Maandamano Malawi aina nyingine ya demokrasia Afrika
- MAKALA YA MALOTO: Serikali, Bunge walianza vizuri sakata la Lissu...
- Kilichomponza Lissu ni utambulisho wake
- HOJA ZA KARUGENDO: Changamoto ni nyingi za mabadiliko tuyatakayo