CCM yaponda wenye siasa za kubomoa

CHAMA Cha Mapinduzi (CCM) kimesema Watanzania wataendelea kukiamini na kuiunga mkono kwa kuwa kimebeba dhamana ya kulinda amani, umoja, mshikamano na maendeleo endelevu.

Katibu Mkuu wa CCM, Daniel Chongolo aliyasema hayo Zanzibar jana wakati akizungumza na wanachama, viongozi na wakereketwa wa chama hicho katika viwanja vya Ofisi Kuu ya CCM Kisiwandui.

Chongolo na wajumbe wa Sekretarieti ya Halmashauri Kuu ya CCM Taifa waliwasili Zanzibar jana.

Alisema CCM haitapoteza muda kucheza upatu kwa kuwaunga mkono wasiojua misingi ya nchi hivyo wanaofanya siasa za kubomoa watasubiri sana na wakati huo chama kikiendelea na kasi ya kujenga nchi kwa kuongozwa na Rais Samia Suluhu Hassan na Rais wa Zanzibar, Dk Hussein Mwinyi.

Chongolo alisema wanasiasa wanaodhani dola au madaraka vinaweza kupatikana kwa shari, vurugu, uvunjifu wa amani, uvunjifu wa tunu za taifa, uzandiki, usaliti dhidi ya nchi kamwe hawatafanikiwa kwa vile serikali za CCM ziko makini.

Alisema CCM inaridhishwa na namna Rais Samia na Dk Mwinyi wanavyotekeleza wajibu wao hasa katika kulinda amani, usalama, umoja na mshikamano.

Awali Makamu Mwenyekiti wa CCM Zanzibar, Dk Ali Mohammed Shein, alisema wajumbe wa Sekretarieti ya Halmashauri Kuu ya Taifa ya chama hicho waipitie historia ya chama cha Tanganyika African Nation Union (TANU) na Afro Shiraz (ASP) kwa kuwa ni msingi mkuu wa CCM.

Dk Sheim alisema hayo viongozi hao walipomtembea nyumbani kwake Mazizini Zanzibar kujitambulisha.

Alisema wanapaswa kufanya kazi kwa kuzingatia maadili na watumie katiba, kanuni na miongozo ya CCM.