CCM yapiga saluti kwa Dk.Mwinyi

Kamati maalumu ya halmashauri kuu ya CCM imempongeza Rais wa Zanzibar, Dk Hussein Mwinyi kwa kudumisha amani, utulivu na mshikamano wa wananchi visiwani humo.

Pongezi hizo zimetolewa leo Jumapili Desemba 12, 2021 wakati wa kikao cha kamati hiyo kilichoongozwa na makamu mwenyekiti wa chama hicho Zanzibar ambaye pia ni rais mstaafu wa Zanzibar, Dk Ali Mohamed Shein katika ofisi za makao makuu ya chama hicho Kisiwandui mjini Unguja.

Kwa mujibu wa taarifa iliyotumwa kwa vyombo vya habari, kikao hicho kimepokea na kujadili taarifa mbalimbali za utendaji kutoka katika idara za CCM Zanzibar.

“Kamati maalumu imetoa azimio la kumpongeza Rais Mwinyi kwa kutimiza mwaka mmoja tangu aingie madarakani na kuridhishwa na uongozi wake wenye mafanikio makubwa yakiwemo kudumisha  amani, utulivu na mshikamano kwa wananchi wote,” inaeleza sehemu ya taarifa hiyo.

Pia kimempongeza kwa uamuzi wake wa kuwarejeshea wananchi fedha zao waliokuwa wanaidai kampuni ya Masterlife Microfinance Ltd iliyokuwa ikiendesha shughuli zke visiwani humo kinyume na sheria na taratibu.

Desemba 7, 2021 Wizara ya Fedha na Mipango Zanzibar  ilianza kuwalipa waoweka fedha katika kampuni hiyo awamu ya kwanza ambao wanadai kati ya Sh100, 000 hadi Sh1 milioni.

Advertisement