CCM Mwanza wapata Mwenyekiti Mpya
Mwanza. Michael Lushinge ‘smart’ ametangazwa mshindi wa kiti cha uenyekiti wa Chama Cha Mapinduzi (CCM) Mkoa wa Mwanza baada ya kujinyakulia kura 784, sawa na asilimia 70.5 ya kura 1,111 zilizopigwa.
Uchaguzi huo mdogo uliofanyika katika uwanja wa CCM Kirumba jijini Mwanza leo Desemba 4, 2023 ulikuwa wa kujaza nafasi iliyoachwa wazi baada ya aliyekuwa Mwenyekiti wa CCM Mkoa wa Mwanza, Sixbert Jichabu kuteuliwa kuwa Mkurugenzi Mtendaji wa Halmashauri ya Wilaya ya Masasi mkoani Mtwara.
Msimamizi Mkuu wa uchaguzi, Said Mtanda amewataja wagombea wengine na kura walizovuna zikiwa kwenye mabano kuwa ni Sabana Salinja (kura 257), David Mulongo (kura 20), Dk Angeline Samike (15) na Elizabeth Nyinge aliyeambulia kura saba.
Ahadi, chaguzi za 2024 na 2025
Akiwashukuru wajumbe mara baada ya kutangazwa mshindi, Lushinge ambaye pia ni Mwenyekiti wa CCM Wilaya ya Misungwi ameahidi kutumia nafasi yake hiyo mpya kuwaunganisha viongozi na wanachama tayari kwa ajili ya ushindi wa chama hicho tawala katika chaguzi zijazo za kuwania, kushika na kuongoza dola zinazoshirikishwa vyama vingine vya siasa.
“Kura nilizopewa na wajumbe ni deni ninalopaswa kulilipa kwa kuihakikishia CCM ushindi katika chaguzi zijazo kuanzia ule wa Serikali za Mitaa mwaka 2024 na uchaguzi mkuu wa mwaka 2025. Naomba kila mwana CCM ashiriki katika juhudu za kukijenga chama chetu ili kiwe imara zaidi tayari kwa chaguzi za 2024 na 2025,’’ amesema Lushinge
Sabana Salinja aliyeshika nafasi ya pili katika uchaguzi huo amewaomba wote walioshiriki mchakato wa uchaguzi huo kuvunja makambi yao ili kwa pamoja waunganishe nguvu na waliochaguliwa kukijenga chama hicho tayari kwa chaguzi zijazo.
“Viongozi wetu kuanzia mwenyekiti mpya wanapaswa kutambua kwamba wana CCM wameweka imani yao kwao….watuunganishe sote kwa umoja wetu ili tukijenge chama,’’ amesema Salinja
Mjumbe wa Halmashauri Kuu ya CCM (NEC) Mkoa wa Mwanza, Jamal Babu ametaja uchaguzi wa Serikali za Mitaa mwaka 2024 kuwa kipimo cha uongozi kwa Mwenyekiti mpya huku akimtaka kuhakikisha chama hicho kinashinda nafasi za uenyekiti wa mitaa na vijiji vyote vya mkoa huo.
Husna Mwakilino, mjumbe wa Kamati ya Siasa ya CCM Wilaya ya Misungwi amewapongeza wagombea na wana CCM wote mkoani Mwanza kwa kufanikisha uchaguzi wa kidemokrasia huku kuwasihi wote walioshiriki mchakato wa uchaguzi huo kuvunja makambi yao ya kampeni na kuunda kambi moja ya ushindi wa chama hicho katika chaguzi zijazo.