ACT Wazalendo wadai Zitto amedhalilishwa

Katibu wa Haki za Binadamu wa ACT Wazalendo Mbarala Maharagande, amesema kuwa kiongozi wa chama hicho Zitto Kabwe amesikitishwa na kitendo cha Polisi kumtoa yeye na wenzake Kilwa na kumpeleka Lindi akiwa kwenye gari la wazi nyakati za usiku kitendo ambacho anadai ni cha udhalilishaji

Maharagande ametoa kauli hiyo leo Juni 24, 2020, wakati akizungumza na EATV&EA Radio Digital, na kusema kuwa mpaka sasa hivi hawajajua hatima ya viongozi hao kama watapewa dhamana, kupelekwa mahakamani ama wataendelea kusota rumande.

"Kiongozi anasikitika tu wamemsafirisha saa 6 usiku kwenye gari la wazi na baridi, haikuwa nzuri wakati kulikuwa na gari lake binafsi, lakini hivyo haikuwa sawa sawa kiusalama na kiheshima kwa kiongozi kama huyu na huu ni udhalilishaji ambao unapaswa kukemewa na kila mpenda demokrasia" amesema Maharagande.

Aidha Maharagande ameeleza tatizo linalomsumbua Mbunge Bwege " Bwege amezoea mikikimikiki isipokuwa ana maradhi ya Sukari na Presha, sasa anapokuwa kwenye mazingira kama hayo anakosa kula na kumeza dawa zake kwa wakati".