Tanzania yaagiza dozi milioni mbili za chanjo

Msemaji Mkuu wa Serikali Gerson Msigwa amesema tayari serikali ya Tanzania imeagiza dozi kutoka nchini China kwaajili ya kuendelea kuhakikisha watanzania wanapata chanjo ya Uviko-19.

Msigwa amesema hayo wakati anatoa taarifa ya wiki ambayo ameeleza kuwa chanjo hiyo ni aina ya Sinopharm na zitakuja dozi milioni mbili.

''Serikali imeagiza chanjo nyingine na tunatarajia kupokea dozi milioni 2 aina ya Sinopharm kutoka China, ambayo mtu unapokea dozi mbili, unachoma ya kwanza baada kama ya wiki tatu mpaka nne hivi wataalam watatueleza vizuri unapokea ya pili'' - Gerson Msigwa, Msemaji Mkuu wa Serikali.

Ameongeza kuwa, ''Sasa kuna kitu kinaitwa Huduma ya Mkoba, wataalam wetu wa afya wanapita vijijini wanawafuata wananchi walipo na kuwapa chanjo ya Uviko-19, kwenye vituo vya mabasi, kwenye Mwenge na hata jana kwenye mechi ya watani wa jadi watu wamepata chanjo lengo ni kuwafikia watanzania walipo'' - Gerson Msigwa, Msemaji Mkuu wa Serikali.