Tanzania kutumia dawa ya corona kutoka Madagascar

SERIKALI ina mpango wa kutuma ndege nchini Madagascar kwa ajili ya kuchukua dawa za kutibu ugonjwa wa corona.

Kauli hiyo imesemwa leo Mei 3,2020 na Rais John Magufuli wakati akimuapisha Waziri wa Katiba na Sheria, Dk. Mwigulu Nchemba aliyemrithi aliyekuwa Waziri wa wizara hiyo Balozi Dk. Augustine Mahiga aliyefariki dunia Mei 1,2020 mjini Dodoma na kuzikwa jana nyumbani kwao Tosamaganga mkoani Iringa.

Magufuli amesema tayari Serikali ya Madagascar imeiandikia barua serikali ya Tanzania kuhusu dawa hiyo, hivyo serikali imeona ni vema ikaileta nchini kwa ajili ya kuwasaidia watanzania.

“Nimewasiliana na watu wa Madagascar kuna dawa kule ya corona wanasema wameipata nitatuma Ndege hiyo dawa ije hapa tuitumie, ”

Amesisitiza kuwa serikali inaendelea kufanya jitihada mbalimbali kuhakikisha Watanzania wote wanaougua corona wanapata msaada stahiki kulingana na uwezo wa serikali.