Tanzania, Angola kubadilisha wataalamu sekta ya afya

Tanzania na Angola zimesaini hati ya makubaliano ya ushirikiano katika sekta ya afya yenye lengo la kubadilishana ujuzi na utaalamu katika Sekta ya Afya ikiwemo huduma za Kibingwa na Ubingwa Bobezi.

Makubaliano hayo yamesainiwa na Waziri wa Afya wa Tanzania, Ummy Mwalimu na Waziri wa Mambo ya Nje wa Angola, Balozi Tete Antonio wakati wa Mkutano wa Pili wa Tume ya Pamoja ya Ushirikiano kati ya Tanzania na Angola uliofanyika leo Januari 16, Zanzibar.

Makubaliano hayo pia yanalenga kuboresha huduma za utalii wa matibabu, huduma za kupandikiza viungo na tishu, huduma za utengamao (rehabilitation services) kwa ajili ya kuendelea kuboresha huduma za Afya baina ya nchi hizo Mbili.