PrEP: Dawa ya kuzuia VVU ina ufanisi mkubwa-Utafiti

Dawa ambayo inakomesha VVU kuambukiza mwili imeonekana kuwa tiba bora ya kuzuia maambukizi katika 'ulimwengu halisi', utafiti umethibitisha.

Matokeo ya utafiti huo kwa watu 24,000 wanaoitumia kote Uingereza, yameelezwa kuwa "ya kutia moyo".

Maelfu ya watu tayari wanatumia PrEP kupitia kliniki za afya ya uzazi.

Shirika la misaada la VVU Terrence Higgins Trust linataka upatikanaji rahisi wa dawa, kwa kuwa watu wengi, ikiwa ni pamoja na wanawake, hawajui kuwa ipo.

Shirika la Usalama wa Afya la Uingereza (UKHSA), ambalo liliongoza Jaribio la Athari za PrEP. na Westminster NHS Foundation Trust, lilisema kuwa ni utafiti mkubwa zaidi kuwahi kutokea duniani wa aina yake.

Ulifanyika katika kliniki 157 za afya ya uzazi kote Uingereza kati ya Oktoba 2017 na Julai 2020.

Utafiti huo uligundua matumizi ya PrEP, ambayo pia inajulikana kama pre-exposure prophylaxis ilipunguza uwezekano wa kupata VVU kwa 86%.Majaribio ya kimatibabu yalipendekeza ilikuwa na ufanisi wa 99%.

Dk John Saunders, mshauri wa afya ya uzazi na VVU ambaye alifanya kazi katika utafiti huo, alisema: "Jaribio hili limeonyesha zaidi ufanisi wa PrEP katika kuzuia maambukizi ya VVU na kwa mara ya kwanza, imeonyesha athari ya kinga iliyoripotiwa na majaribio ya awali, lakini kwa kiwango, na hutolewa kupitia huduma za kawaida za afya yauzazi nchini Uingereza."

Shirika la kutoa misaada la VVU la Terrence Higgins Trust lilikaribisha uchapishaji wa utafiti huo, lakini lilisema kuna "mengi zaidi ya kufanywa" ili kuongeza ufikiaji na ufahamu wa dawa hiyo, haswa miongoni mwa vikundi vya watu wachache.

Debbie Laycock, mkuu wa sera, alisema: "Tunafikiri kwamba kuna jamii fulani na watu binafsi kwa sasa ambao wanaweza kufaidika na PrEP lakini hawaifikii."

"Wanawake wengi hawajui PrEP ipo," aliongeza.

Alisema shirika la misaada lilikuwa linatoa wito kwa PrEP kupatikana katika maduka ya dawa na mtandaoni ili kupanua ufikiaji wake.