Mvua yaleta adha ya usafiri Mbagala

Dar es Salaam. Mvua inayoendelea kunyesha jijini Dar es Salaam kuanzia leo alfajiri Ijumaa Mei 10, 2019 imesababisha adha ya usafiri kwa wakazi wa Mbagala kutokana na daladala nyingi kutofanya kazi.

Mwananchi limeshuhudia makundi ya watu yakiwa vituoni wakisubiri usafiri bila mafanikio.

Wakati wakionekana kuwa na nyuso za kukata tamaa huku wakiloana, daladala zimeonekana zikiwa zimeegeshwa maeneo mbalimbali.

Changamoto inaonekana kubwa zaidi kwa wanafunzi huku baadhi yao wakionekana kusindikizwa shuleni.

Sehemu kubwa ya barabara ya Kilwa hasa eneo la Mbagala Zakhiem na Mbagala Rangi tatu zimefurika maji hali inayosababisha magari kupita kwa tabu.