Msanii wa Bongo Fleva anayechipukia, Loyce Obongo, maarufu ‘Tyce’ amesema haamini katika kufanya kolabo na wasanii wakubwa ndio humfanya msanii kutoka kimuziki.
Akizungumza na Mwananchi, ‘Tyce’ ambaye pia ni mwandishi wa habari wa kituo cha East Africa TV(EATV), alisema huwa anaamini msanii akisimama mwenyewe inamsaidia kuonyesha uwezo wake kuliko kubebwa na msanii mkubwa.
Anashukuru kwake limemsaidia kwani tangu alipoachia wimbo wake wa kwanza ‘Nitasahau’ amejua nguvu aliyonayo kimuziki, uwezo wakushindana na kipi anapaswa kurekebisha ili akimbizane na soko la muziki linavyotaka.
“Kwani naamini kuanza kutoka kimuziki kwa kufanya kolabo ni sawa na kubebwa na baadaye ukipewa nafasi kusimamia peke yako huenda ukajikuta unashindwa,”’ alisema Tyce.
Katika matarajio yake alisema ni kuendelea kutoa nyimbo nzuri huku mwaka huu akitarajia kuachia nyimbo nne.
Pamoja na kutoamini katika kushirikiana na mastaa, anasema akishasimama kimuziki angependa kufanya kazi na Barnabas na Alikiba.