Tanzania Web Photo
Tiketi za VIP kwa ajili ya onyesho la msanii Ali Kiba, zimekwisha tangu jana Ijumaa usiku Desemba 28, 2018 huku watu wakiendelea kuziulizia kwa wingi.
Tiketi hizo ni zile zinazouzwa kwa meza moja Sh400,000 ambayo kila moja wanakaa watu wanane.
Mwananchi iliyokuwa eneo ambalo shoo hiyo itafanyika katika Ukumbi wa Next Door Masaki jijini Dar es Salaam leo Jumamosi imesikia waandaaji wakipigiwa simu kuuliziwa huku wengine wakitaka wauziwe hata mara mbili ya bei iliyopangwa.
Akielezea hilo, Meneja wa Ali Kiba, Christina Mosha 'Seven', amesema tiketi hizo ziliisha tangu jana saa tano usiku.
"Kwa kweli hatukutegemea mwitikio huu, tunawashukuru sana mashabiki wa Ali Kiba na tunawaahidi hatutawaangusha kwani wasanii watakaoburudisha leo tuna imani watakata kiu za watakaofika.”
"Kwa wale ambao wamekosa ticketi za VIP wanaweza kukata za kawaida kwani bado zinapatikana katika vituo mbalimbali tulivyotangaza vya kuuzia tiketi hizo," amesema Seven.
Shoo hiyo iliyopewa jina la Funga mwaka na AliKiba, itapambwa na wasanii wengine akiwemo Barnaba, Bilnas, MwanaFA, Mr. Blue, Nuh Mziwanda na The Kings Music huku lengo kubwa likiwa ni kutambulisha kinywaji chake cha Mofaya.