Shamsa Ford naye ajitosa kwenye muziki

Wimbi la wasanii wa kike wa filamu kujitosa kwenye muziki limezidi kuongezeka ambapo safari hii, Shamsa Ford naye ametangaza kuanza kuimba.

Kupitia ukurasa wake wa Instagram, Shamsa aliweka picha inayomuonesha yeye na Flora (muimbaji wa nyimbo za Injili) wakiwa studio na kusindikiza na ujumbe huo wa kutangaza kujiunga na muziki.

"Watanzania naombeni mnipokee nimeingia kwenye muziki. Mwanzo ni mgumu ila napambana maana leo hata kuongea siwezi sauti imekauka maana niliimba ile sauti ya juu kabisaaaa. Nakushukuru dada yangu @madam_flora @madam_flora umeniongoza vyema.”

Licha ya Shamsa kutoasema anaingia kwenye muziki wa aina gani lakini huwenda ukawa muziki wa Injili kutokana na kuonesha dhahiri kwamba anasaidiwa na Flora ambaye inafahamika anaimba muziki wa Injili.

Warembo wengine ambao walikuwa waigizaji na kujitosa kwenye muziki ni pamoja na Zuwena Mohamed ‘Shilole’, Salma Jabu ‘Nisha’ na Rose Ndauka.