Mwana FA afunguka kuhusu kumshughulikia Steve Nyerere

Naibu Waziri wa Utamaduni, Sanaa na Michezo na msanii wa Bongo Fleva, Hamisi Mwinjuma ‘Mwana FA’ amesema mamlaka aliyopewa na Rais Samia Suluhu si kwa ajili ya kumshughulikia msanii mwenzake Steve Nyerere badala yake ni kwa ajili ya kuiinua Sanaa na wasanii kwa ujumla.

Mwana FA ametoa kauli hiyo wakati akihojiwa mara baada ya kuwasili katika ofisi za wizara hiyo, jijini Dodoma kufuatia uteuzi wake hivi karibuni.

“Watu wanamtania tu Steve kwa sababu yeye ni mtu wa mizaha na anawatania watu wengi vilevile kwa hiyo hawezi kusalimka kwa kauli yake kwa sababu kama ilivyo kwake watu hawasalimiki kwa mdomo wake.

“Nimepewa nafasi hii na Rais ili nikaisaidie sanaa, siwezi kutumia nafasi hii kwa ajili ya kumshughulikia Steve Nyerere, hapana.

“Kama ana jambo lake la kuisaidia sanaa yake asisite, aje mbio kabisa kwangu kwa sababu ndiyo shughuli yangu na nitahakikisha yanatokea, hayo mengine nadhani wanamtania tu sababu ya mizaha yake.

“Mimi nililiacha palepale nililokuwa nalitaka lilifanikiwa, hatuwezi kuendelea kuwekeana vinyongo visivyo na maana yoyote,” amesema Mwana FA.

Ikumbukwe kuwa, mwaka jana (2022), Mwana FA alipinga hadharani uteuzi wa Steve Nyerere kuwa msemaji wa Shirikisho la Wasanii Tanzania na kumuaka uongozi wa Shirkisho hilo kutengua uteuzi wa Steve ndani ya saa 48.

Jambo hilo lilimkera Steve Nyerere na kuibuka akidai kuwa Mwana FA hana mamlaka hayo huku akidai kuwa ubunge wake ni wa kupewa, jambo lililoibua hisia tofauti.