Muigizaji Nigeria Junior Pope afariki katika ajali ya boti

Muigizaji wa Nollywood Junior Pope Odonwodo, almaarufu Jnr Pope amefariki dunia katika ajali ya boti alipokuwa akisafiria kurekodi filamu katika jimbo la Delta nchini Nigeria, waigizaji wenzake wamesema.

Nyota huyo wa filamu aliripotiwa kunusurika kwenye ajali hiyo wakati madaktari walipojaribu kumhudumia hospitalini. "Inasikitisha sana kwamba furaha yetu ilikuwa ya muda mfupi.

Hospitali mbili mashuhuri zilijaribu kadiri ya uwezo wao lakini hazikufaulu. Hatimaye tulimpoteza," Emeka Rollas Ejezie, rais wa Chama cha Waigizaji cha Nigeria (AGN), aliandika kwenye Facebook.

Video zilizosambazwa kwenye mitandao ya kijamii zilionesha waokoaji wakiwa wamembeba mwigizaji huyo, ambaye alionekana kupoteza fahamu, nje ya Mto Niger ambapo kisa hicho kilitokea Jumatano jioni.

Saa chache kabla ya ajali, mwigizaji huyo mwenye umri wa miaka 39 alikuwa amesambaza video yake na wengine wanne kwenye ukurasa wake wa Instagram wakisafiri hadi eneo la sinema kwa boti.

Alisikika akielezea wasiwasi wake kuhusu ukosefu wa hatua za usalama na kuomba safari salama.

Pope Jnr meigiza katika zaidi ya filamu 150 za Nollywood na anafahamika zaidi kwa kucheza nafasi za mhalifu, mlinzi na mwimbaji. Waigizaji wenzake wamejitokeza kwenye mitandao ya kijamii kumuomboleza.

Nollywood imepata pigo kutokana na kuwapoteza nyota wengine wawili wa tasnia hiyo, John Okafor, anayejulikana zaidi kama Bw Ibu na Amaechi Muonagor.