Msanii aliyeigiza kama muuza madawa afariki dunia

Angus Cloud, 25, aliyeigiza katika filamu maarufu ya HBO Euphoria amefariki dunia.

Cloud, ambaye aliigiza muuza madawa ya kulevya Fezco "Fez" O'Neill kwenye tamthilia ya vijana, alifariki Jumatatu nyumbani kwa familia yake huko Oakland, California, mtangazaji mmoja alisema.

"Kwa moyo mzito zaidi tulilazimika kumuaga binadamu wa kipekee leo," ilisema taarifa kutoka kwa familia ya Cloud.

Cloud alimzika babake wiki iliyopita, na kulingana na familia, alikuwa akikabiliwa na "tatizo la afya ya akili".

"Faraja pekee tuliyo nayo ni kujua Angus sasa ameungana na baba yake, ambaye alikuwa rafiki yake mkubwa," taarifa hiyo ilisoma.

"Tunatumai kuwa kifo chake kinaweza kuwa ukumbusho kwa wengine kwamba hawako peke yao na hawapaswi kupigana na tatizo hili peke yao kimya kimya."

Sababu ya kifo chake haijatolewa.

Wiki mbili zilizopita, Cloud aliweka picha ya baba yake kwenye mtandao wa Instagram na kuandika: "miss u breh."

Chanzo karibu na familia ya Cloud kiliiambia Entertainment Tonight kuwa Cloud "amekuwa akipambana na mawazo makali ya kutaka kujitoa uhai" baada ya kurejea kutoka Ireland alikomzika baba yake.

Cloud alikuwa anakaa na familia yake, ET iliripoti, "alipojaribu kukabiliana na huzuni aliyokuwa anapitia".

"Tuna huzuni kubwa kujua kuhusu kifo cha Angus Cloud. Alikuwa na kipawa cha hali ya juu na sehemu ya upendo mkubwa ya HBO na familia ya Euphoria," HBO ilisema katika taarifa.

"Tunatuma salamu zetu za rambirambi kwa marafiki na familia katika kipindi hiki kigumu."

Cloud alikuwa na sifa ndogo za uigizaji katika filamu mbili, North Hollywood na The Line.

Pia alikuwa ameonekana kwenye video za muziki za wasanii wakiwemo Becky G, Karol G na Juice WRLD.

Lakini taaluma yake ilianza kung’aa baada ya kuigiza kama Fez, muuzaji wa dawa za kulevya wa shule ya upili huko Euphoria.