Mrembo atelekezewa bili ya chakula na mzungu

Mrembo mmoja wa Kiafrika amewachekesha wengi baada ya kuelezea masahibu aliyopitia wakati wa mtoko na mpenzi wake mwenye asili ya Kizungu.

Mrembo huyo anaelezea kwamba ilikuwa ndiyo mara ya kwanza wanakutana na mpenzi huyo Mzungu ambapo waliingia katika mgahawa kushtaki njaa na kilichotokea baada ya chakula ni kumbukumbu za tukio ambalo atakwenda kulala kaburini likiwa kichwani mwake.

Katika video aliyoposti kwenye TikTok, mrembo huyo anasema kuwa, baada ya mlo, mpenzi wake Mzungu aliingia mfukoni na kutoa kalamu kisha kuanza kupiga hesabu.

Anasema kuwa, Mzungu alipiga hesabu ya bili yote na kumtaka binti wa watu washirikiane kulipa ile bili pasu kwa pasu!

“Tafakari kwamba upo katika kukutana kwa mara ya kwanza na mpenzi wako Mzungu na anavuta kalamu kutoka mfukoni na kuanza kupiga hesabu ya bili yake na kuacha nyingine ambayo wewe umekula,” mrembo huyo ameeleza kwa masikitiko makubwa.

Watu mbalimbali wametoa maoni yao ya jinsi walivyojikuta katika visa kama hivyo huku wengine wakisema mrembo huyo alikuwa mpole mno, kwani angezua tafrani hapo hapo.