Mchungaji awatimua wasimamizi wa harusi

Hisia mbalimbali zinazidi kuibuka kutokana na hatua ya pasta mmoja wa kanisa la Waadventista Wasabato - SDA kuwatimua wasimamizi waliokuwa wamevalia sketi zenye mkato.

Kanisa hilo limewataka Wakenya kujiunga na wao wakisema wanakaribisha kila mmoja pasi ubaguzi wowote.

Waliomba msamaha kuhusu kisa cha pasta wao na kusema huenda alikerwa pakubwa na hivyo akachukua hatua iliyozidi.

Kwa mujibu wa kanisa hilo, kila mmoja anafaa kuwa na uhuru wa kuabudu na kushirikiana na wengine pasi kubaguliwa.

"Tunachukua nafasi hii kupitia ukurasa huu kuwaomba msamaha Wakenya ambao walihisi kuwa pasta wetu aliwafukuza kutoka kanisa letu.

Labda alikuwa amekerwa na hivyo akachukua hatua kali zaidi. Tunawapenda nyote na tunawakaribisha katika kanisa letu. Kanisa la SDA ni letu sote," tangazo la kanisa hilo lilisema.

Kisa hicho kilichozua hisia mseto kilitokea katika kanisa la Tente SDA kaunti ya Nyamira ambapo Pasta Jared Omwoyo alilipuka.

"Kama umevaa jinsi isivyo stahili, try somewhere else not this Seventh-day Adventist church. Harusi tunayofanya inaitwa harusi takatifu, ndoa takatifu. Hata kanisa haiwezi kaa na vitu ambavyo haviendi na mpango wa Mungu," aliambia kundi la wasimamizi

Familia ya bibi harusi kupitia mmoja wa dadake ilijitokeza na kukemea alichofanya mhubiri huyo akisema aliharibu siku iliyofaa kuwa kubwa katika maisha ya bibi harusi.

Wakenya wamekuwa na hisia mseto kuhusiana na kanisa la SDA tangu kisa hicho kilipotokea.