Manara: Mimi bado ni masikini

Aliyekuwa msemaji wa Klabu ya Yanga, Haji Manara amesema kuwa yeye bado ni masikini ndio maana anapambana usiku na mchana kuyatafuta mafanikio na si kama baadhi ya watu wanavyomfikiria kuwa ana pesa.

Manara amesema hayo wakati akihojiwa na Clouds TV kuhusu maisha yake na kuongeza kuwa, Manara wa mitandaoni ni tofauti na maisha yake binafsi.

"Asubuhi naingia ofisi za Yanga, nikitoka naenda Manara Tv ikifika saa8 naondoka naenda nyumbani na sitoki tena mpaka kesho labda kuwe na kuna rafiki yangu ana-party atanialika nachagua je nikienda inaathari gani? Nikienda lazima niache alama je itakuwa na impact? Itanifaidisha mimi kibiashara?

Mimi sifanyi kitu kumfurahisha mtu maana mimi bado maskini. Nasomesha watoto, nina familia kubwa ya kiafrika majukumu ni mengi hivyo mimi kwangu nje ya mitandao siko kama wengi wanavyodhani," amesema Manara.