Kizz Daniel aachiwa polisi kwa dhamana ya Harmonize

Supastaa kutoka Nigeria, Oluwatobiloba Daniel Anidugbe maarufu kama Kizz Daniel ameachiwa baada ya kuwekewa dhamana na msanii Harmonize usiku wa kuamkia leo ikiwa ni takribani saa 6 tangu aliposhikiliwa na jeshi la polisi.

Kizz alikamatwa jana Jumatatu Agosti 8, 2022 majira ya saa 10 alasiri na kushikiliwa katika kituo cha Polisi Oysterbay baada ya kukacha shoo ya Summer Amplified aliyotakiwa kufanya usiku wa kuamkia jana jijini Dar.

Pamoja na staa huyo wa wimbo wa Buga kutua kwenye ardhi ya Tanzania staa huyo hakufanikiwa kufanya shoo hiyo huku sababu za Kizz kutotokea Jukwaani zikiwa hazifahamiki.

Licha ya Kizz kutotokea jukwaani mastaa wengine kutokea nchini Tanzania kama Marioo, Saraphina, Mabantu na Young Lunya walifanikiwa kutoa burudani kwenye shoo hiyo iliyofanyika kwenye ukumbi wa #WareHouse zamani Nextdoor.