Kim Kardashian 'feki' afariki dunia akifanyiwa upasuaji kuongeza makalio

Christina Ashten Gourkani, mwanamitindo Mmarekani mwenye umri wa miaka 34 ambaye alitumia jina la Ashten G mtandaoni na kujizolea umaarufu mkubwa kwenye mtandao wa OnlyFans kutokana na muonekano wake wenye mfanano na mwanasosholaiti Kim Kardashian amefariki dunia.

Inaarifiwa kwamba Ashten G alifariki dunia akiwa katika chumba cha kufanyiwa upasuaji kuongeza makalio baada ya kupatwa na mshtuko wa moyo ghafla.

Wakati Bi Gourkani alifanyiwa upasuaji mwingi wa urembo katika maisha yake mafupi - yote hayo yalibeba hatari ambazo angefahamu vyema - familia yake inataka majibu kwa nini upasuaji huu uliisha kwa msiba.

"Kifo chake cha ghafla na cha kusikitisha kinachunguzwa kwa sasa... kinachohusiana na utaratibu wa matibabu ambao ulichukua mkondo mbaya," familia walisema katika taarifa.

Mshtuko wa moyo hutokea wakati moyo unaacha ghafla kusukuma damu karibu na mwili, ambayo ni kawaida kutokana na tatizo la ishara za umeme katika chombo.

Mwanamitindo huyo wa mtandao wa kijamii alikuwa amechapisha chapisho lake la mwisho la Instagram mnamo Jumanne, Aprili 18, ambalo lilikuwa na selfies tatu za Gourkani akifanana kabisa na Kardashian alipokuwa amevalia sidiria ya michezo ya manjano na kaptura nyeusi inayobana.

Msemaji wa familia kisha alielezea 'ndoto hai' ya kutazama afya yake ikishuka hospitalini kufuatia mshtuko wa moyo wake.

Mwaka jana, Radio Jambo tuliripoti kwamba mwanasosholaiti Amelia Pounds kutoka Nigeria alifariki pia nchini India alipokuwa akifanyiwa upasuaji wa liposuction, ambao ulimwendea mvange.

Katika video ambayo ilikuwa ikisambazwa mitandaoni, mwanasosholaiti huyo alionekana amezima kabisa na mwili wake kugeuka gogo tu lisoloweza kujisogeza.

Mpaka kifo chake, Amelia Pounds alikuwa na umri wa miaka 28.

Iliripotiwa kuwa aliaga dunia Ijumaa asubuhi, Oktoba 7, 2022. Ingawa, haijulikani ni nini kilisababisha matatizo hayo, inasemekana alikata roho wakati akifanyiwa upasuaji hospitalini.