Kim Kardashian afunguka changamoto kulea watoto 4 peke yake

Kim Kardashian, mmoja wa mastaa wakubwa duniani, amefunguka waziwazi kuhusu ugumu wa kuwa ‘single mother’ baada ya kuachana na Kanye West.

Kim na Kanye walikuwa pamoja kwa miaka kumi na walibarikiwa kupata watoto wanne: North (10), Saint (8), Chicago (6), na Psalm (5). Tangu walipoachana mwaka 2021, Kim amekuwa akifanya kazi kubwa ya kuwalea watoto wao huku akishirikiana na Kanye kama mzazi mwenzake.

Kwenye kipindi kipya cha The Kardashians, Kim alifunguka kuhusu kufikia hatua ya kuvunjika moyo bila msaada anaohitaji. Akizungumza kuhusu jinsi anavyopambana na kuweka mipaka thabiti kwa watoto wake, Kim alisema:

“Sijui kwa nini sina uwezo wa kuwa mkali sana.” Alieleza kuwa wiki iliyopita ilikuwa ngumu sana kwake kiasi kwamba alijifungia bafuni ili kujiepusha na watoto wakati akijaribu kukamilisha mahojiano muhimu.

Kim alieleza jinsi anavyopambana na changamoto za kuwa mkali kwa watoto wake, hasa North, akisema: “Nilimnyang’anya simu, na baada ya siku moja, nikampa tena. Mimi ni mnyonge sana. Lakini niliinyang’anya kwa saa 24.”

Akiongea kwenye mahojiano ya faragha, Kim alimsifu dada yake, Khloé, kwa uwezo wake wa kuweka mipaka thabiti kwa watoto wake, True (6) na Tatum (1).

Hata hivyo, Kim alikiri kwamba anapata msaada kutoka kwa wafanyakazi wa nyumbani kama vile wasaidizi wa watoto na wapishi, ingawa alikumbana na ukosoaji baada ya kusema kwenye podcast ya Jay Shetty kwamba analea watoto wake “bila kuwa na mtu yeyote wa kumsaidia.”

Kim Kardashian anaendelea kuonyesha nguvu na uvumilivu katika safari yake ya malezi peke yake, akitoa mfano wa jinsi akina mama wanaweza kukabiliana na changamoto za maisha ya kila siku huku wakiwalea watoto wao kwa upendo na kujitolea.