Idris Elba afunguka sababu za kuhamia Afrika

Mwigizaji wa Uingereza Idris Elba, ameiambia BBC kwamba atahamia Afrika ikiwa ni sehemu ya mipango yake ya kusaidia tasnia ya filamu.

Nyota huyo mwenye umri wa miaka 52, ana mpango wa kujenga studio ya filamu katika visiwa vya Zanzibar nchini Tanzania na studio nyingine katika mji mkuu wa Ghana, Accra.

Elba ambaye ni mzaliwa wa jijini London nchini England, mama yake anatokea Ghana na baba yake anatokea Sierra Leone.

Anataka kutumia uwezo wake ili kuunga mkono biashara ya filamu inayoendelea kukua kwani anasema ni muhimu Waafrika wapate kusimulia hadithi zao wenyewe.

"Kwa hakika nafikiria kuhamia hapa, sio kufikiria, nitahamia," alisema katika mahojiano kando ya mkutano wa tasnia ya filamu huko Accra.

"Nafikiri nitahamia katika miaka mitano ijayo au 10, Mungu akipenda. Niko hapa ili kukuza tasnia ya filamu huo ni mchakato wa miaka 10, sitaweza kufanya hivyo nikiwa ng'ambo. Napaswa kuwa ndani ya nchi, ndani ya bara."

"Nitaishi Accra, nitaishi Freetown mji mkuu wa Sierra Leone, nitaishi Zanzibar. Nitajaribu kwenda kule wanakosimulia hadithi, hilo ni muhimu sana." Alisema.