Msanii Rajabu Abdul 'Harmonize'
Msanii wa muziki wa kizazi kipya, Rajabu Abdul ‘Harmonize’ ametangaza kuanza ziara ya muziki duniani kuanzia Aprili 29, mwaka huu itakayokwenda kwa jina la Single Boy World Tour.
Kupitia ukurasa wake wa mtandao wa kijamii wa Instagram jana, Harmonize alisema ziara ya kwanza ataifanya nchini Marekani huku akionesha shauku ya kufanya kazi baada ya muda mrefu kushindwa kutoka kwenda mbali.
“Single boy world tour starts 29/4 Arizana,” aliandika ujumbe huo kwenye ukurasa wake.
Harmonize amekuwa msanii asiyezimika kutokana na kutoa nyimbo kali kila baada ya muda fulani kiasi cha kuendelea kufuatiliwa na mashabiki zake mbalimbali wa ndani na nje ya nchi.
Kwa sasa anaendelea kufanya vizuri na wimbo wa Single again alioutoa hivi karibuni baada ya kuachana na aliyekuwa mpenzi wake, Kajala Masanja na kueleza kuwa yeye hana mtu.
Wimbo huo umepokelewa vizuri sio tu na wale wasiokuwa na wapenzi bali hata walioko kwenye ndoa kutokana na kuvutia kuchezeka kwa watu wa rika tofauti.
Huenda ziara hiyo ikamkutanisha na wasanii mbalimbali wa kimataifa na pengine kufanya nao nyimbo za pamoja.
Hivi karibuni aliweka picha ya Chris Brown kwenye ukurasa wake jambo ambalo limewafanya wengi kujiuliza pengine kuna kazi ya pamoja inakuja mbele.