Facebook na Instagram zaachana na matangazo yanayolenga dini, siasa na rangi

Siku chache baada ya Fabebook kubadili jina lake na kujiita "Meta", sasa kampuni hiyo inafanya mabadiliko mengine yanayolenga matangazo katika mifumo yake yote kama vile Facebook na Instagram, kumaanisha kwamba biashara hazitaweza tena kuelekeza matangazo kwa watumiaji wa rangi mahususi, mfuasi wa kisiasa au mwelekeo wa ngono.

Hatua hiyo inakuja baada ya kukosolewa kwa miaka mingi kuhusu kanuni za utangazaji za kampuni, ambazo mara nyingi zimekuwa zikichukuliwa kuwa vamizi kwa faragha za watumiaji.

META imetangaza mabadiliko hayo katika chapisho lake siku ya Jumanne, ikibainisha kuwa "uamuzi huo mgumu" ulitokana na maoni kutoka kwa wataalam wa haki za kiraia na watunga sera. Mabadiliko hayo yataanza kutumika rasmi kuanzia Januari 19, 2022.

Machaguo ya matangazo ya Meta hayatatoa tena Ulengaji wa Kina kuhusu mada ambazo "watu wanaweza kuchukulia kuwa nyeti." Mfano ni pamoja na mada zinazohusiana na afya, rangi, siasa, dini au ujinsia.

"Tumepata wasiwasi kutoka kwa wataalam kwamba chaguzi zinazolenga kama hizi zinaweza kutumika kwa njia zinazosababisha hali mbaya ya matumizi kwa watu walio katika vikundi vyenye uwakilishi mdogo," alisema Graham Mudd, Makamu wa Rais wa Meta wa uuzaji wa bidhaa na matangazo.

"Mabadiliko haya yanaathiri sifa zote za Meta ambapo watangazaji wanaweza kuonyesha matangazo, ikiwa ni pamoja na Facebook/IG/Messenger na mtandao wetu wa hadhira," msemaji wa Meta aliiambia Mashable.